Sunday, June 23, 2013

എഴുതാന്‍ മറന്നവ....



എഴുതിവെച്ചതൊക്കെയും
നുണകള്‍.
എഴുതാന്‍ ബാക്കിയായവക്ക്
ഒരു ദര്‍ഭമോതിരം.
കാറ്റിന് തീ പിടിച്ച്
കവിതകള്‍ പൊട്ടിച്ചീറ്റുമ്പോള്‍
വെടിമരുന്നിന്‍റെ മണം
നിന്‍റെ ചോരക്ക്.
ഇരുട്ടുവാക്കിനു ഒരു
നിശ്ചല സ്വപ്നം
പൂക്കുമ്പോള്‍
സന്ധിബന്ധങ്ങള്‍ വിട്ട്
തകര്‍ന്നു വീഴുന്ന ഒരു
ജീവിതരാഗം.
അതിന്‍റെ വിഹ്വലതകള്‍...

Friday, June 7, 2013

എന്‍റെ കവിതകള്‍






എന്‍റെ ഉള്ളിലെ കവിതകള്‍
പുറത്തുപോയിരിക്കയാണ്‌
കടലുകാണാന്‍....
തീരത്ത് ദുര്‍ഗന്ധം
വമിക്കുന്ന മലമൂത്രവിസര്‍ജനങ്ങള്‍ക്കിടയില്‍
അവ സ്വഛ്ചന്ദ൦ പാറിനടന്നു.
സൂര്യാസ്തമനം ആസ്വദിച്ചു
ആരൊക്കെയോ പകുതിയാക്കിയിട്ട
ചുംബനങ്ങള്‍ ചിപ്പിയിലെടുതുവച്ചു.
അവര്‍ കടല്‍പ്പറവകളെ
കൊഞ്ഞനം കുത്തി.
വൃത്തികെട്ട ഞണ്ടുകളെ
കബളിപ്പിച്ചു.
ആരോ ഉയര്‍ത്തിവിട്ട ബലൂണിനെ
കുത്തിപൊട്ടിച്ചു രസിച്ചു
കാറ്റിനൊപ്പം ഐസ്ക്രീം നുണയുകയും
മണല്‍വീടുകെട്ടികളിക്കുകയും ചെയ്തു
ഒടുവില്‍ അവ എന്‍റെ അടുത്ത് തന്നെ
തിരിച്ചെത്തി.
കടല്‍ക്കാറ്റിനാല്‍ ദ്രവിച്ചു
മുറിവുകള്‍ ഉപ്പേറ്റു പുകഞ്ഞ്.
അപ്പോഴും നഷ്ട്ടം എനിക്കുതന്നെ.