Saturday, January 2, 2016

ഞാന്‍!!!








കുലം വിട്ടു
കാവ് തീണ്ടി
ഊരുവിലക്ക് ഏര്‍പ്പെട്ടവന്‍ ഞാന്‍...

ഇന്നു
നാല്‍ക്കവലകളിലെല്ലാം
വിപ്ലവം നടുന്നു
വളര്‍ന്നു വന്നൊരു
ബോധിവൃക്ഷമാവാന്‍..

ഇന്നു കൂരിരുട്ടില്‍
മിന്നാമിനുങ്ങിനെ നട്ടും
പച്ചവെയിലില്‍
മരുപ്പച്ചതീര്‍ത്തും ഞാന്‍..


ചോര്‍ന്നൊലിക്കുന്ന
കൂരയില്‍
സ്വപ്നം തറച്ചും
ഒതുങ്ങിയ വയറില്‍
അക്ഷരം നിറച്ചും ഞാന്‍

പൊടിക്കാറ്റെറ്റു
വിയര്‍പ്പു വീണു നേടിയ
ഒരു പൊതിച്ചോര്‍
പങ്കുവെച്ചും
കൂട്ടുകാരന്‍റെ
വിയര്‍പ്പില്‍ പങ്കുപറ്റിയും
ഞാന്‍...

പെറ്റിട്ട ഗര്‍ഭപാത്രം
കരയുമ്പോള്‍
കണ്ണീര്‍ തുടച്ചും
വളഞ്ഞു പോയ
ആ മനുഷ്യന്‍റെ
ഊന്നുവടിയായും ഞാന്‍..

കാറ്റിനെ പിടിച്ചുകെട്ടി
ദിക്കുകളെ മാറ്റിമറിച്ചു
ഇന്നു കാലത്തെ വെല്ലുവിളിക്കുന്നു

കുലം വിട്ടു
കാവ് തീണ്ടി
ഊരുവിലക്കേര്‍പ്പെട്ടവന്‍...

ചുരുട്ടിയ മുഷ്ട്ടിയും
തിളയ്ക്കുന്ന നോട്ടവും നിനക്ക്...
നിന്‍റെ നിര്‍ജീവതക്ക്...
നിന്‍റെ ഞെട്ടറ്റു വീണ നാക്കിന്...
നിന്‍റെ കെട്ടിയ കൈകള്‍ക്ക്...
നിന്‍റെ അടിയറവു വച്ച തലച്ചോറിന്...


ഇന്നു ഞാന്‍ പ്രാണന്‍റെ
ചോരയില്‍ വിരല്‍ മുക്കി
ഇന്ക്വിലാബിനു
ചുവപ്പിന്‍റെ തടം കോരും..
സ്വാതന്ത്ര്യം കൊതിക്കുന്ന കൈകള്‍ക്ക്
വളമായിമാറാന്‍...

കുലം വിട്ട്
കാവുതീണ്ടി
ഊരുവിലക്ക്‌ ഏര്‍പ്പെട്ടവന്‍ ഞാന്‍....!!!